ست الحبايب

بعد كان الحنان اظلال ضافي عليًا=من يدين سقاها الحب عطف وسالا
مات ذاك الحنان ولابقى منه شيًا=كود ذكرى عزيزه في حلوق الدلالا
امي اللي خذاها الموت مني عشيًا=زهرة من فؤادي واقطفتها الليالا
كانت اتقول جعل ايديك تقبر يديًا=جعل يومي قبل يومك عساها جمالا
كانت الشمس تملا كل الاوطان ضيًا=كانت الكوكب اللي في سمانا تلالا
كنت انادي يايمٌه كلمة ثوب ليٌا= يستر الخوف وبعين الخلايق جمالا
اما ذاالحين ماعاد انطق الاسم ذيٌا=راح من يستحق ادعيه بأطهر مقالا
ماتت الورده اللي عطرها فاح فيٌا=ماتت اللي رضاها مايقارن بمالا
ما اكبر الهم يايمه وكبر البليٌا=كني اللي على ظهره يشيل الجبالا
والله اني كما من مات في ثوب حيٌا=امشي مع الملا لكن عايش لحالا
كيف ابسلاك يايمه واعود نسيٌا=وانتي النور قدامي على كل حالا
كيف جفني يغمض في منامي هنيٌا=والجلل في حياتي فاق كل احتمالا
مايعوض حنانك كلمة اخت وخيٌا=مايعوض حنانك عطف عم وخالا
اه والليل يلويني على الحزن ليٌأ= والهموم اقبلت في وسط قلبي توالا
اه من هو يعوضني ويعطف عليٌا= لا اهملت دمعتي والراس عالكتف مالا
يالله اني ذليل يم عفوك رجيٌا= تغفر الذنب وتخفف عليها السؤالا
يالله انك تغسلها بماء وبرديٌا=نقها من الخطايا يا عزيز الجلالا
واسكن امي جنان الخلد منزل عليٌا=جنة عفوك الضافي عليها ظلالا