راكب اللي والنجوم اللامعاتـي = في سماهن والصباح يشع ضيـه
بين حي الجامعـة والمرسلاتـي = واستدار امع الخطوط الدايريـة
ما التفت راعيـه يـم اللافتاتـي = حافظ كـل الخطـوط الريسيـة
أول أسمه بالثـلاث المفرداتـي = رقم خمسة بالحروف الأبجديـة
تـو لوحاتـه عليـه مركباتـي = صادرات من مرور الناصريـة
وارد تـوه حديـث مواصفاتـي = يلتهـب بديـه ويلمـع داخليـه
كن طبلونـه جهـاز مراقباتـي = في حدى المستشفيات المركزيـة
شاشـة لنباتهـا مثـل السفاتـي = للدمـاغ مخصصـة والباطنيـة
تنكشف به بالضروف الطارياتي = دقة القلـب السريعـة والبطيـة
وكشنه الداخل زلـول ناعماتـي = قبتـه وارضيـتـه والجانبـيـة
والمراتب من جلود الزاحفاتـي = ماآدري هو جلد داب أو جلد حية
ماقطعت الشك ميـر مموهاتـي = مثل تمويـه البـدال العسكريـة
بديه أدهم والخطـوط مذهباتـي = مثل عقد الماس في عنق الفتيـة
والزوايا والركـون مصفحاتـي = مايله والواجهـه مثـل الخليـة
بين شمعات صغـار مربعاتـي = والعلامـة وردة فـي مزهريـة
يوم مريت العيـون الساهراتـي = قوةٍ للأمن فـي حجـم السريـة
قبل ما آقف عندهم واطلع اثباتي = صفو العسكر ودقوا لـه تحيـة
مشترينـه للديـار النازحـاتـي = والخطوط المتعبـات السرمديـة
الطوال اللـي تشـق النايفاتـي = باتـلات مثـل بطـن البندقيـة
ماتخاويـه الريـاح الذاريـاتـي = والوحش والطايرات المروحيـة
كن له جنحان مثـل الطايراتـي = يرفعنـه فـوق مـدري جاذبيـة
وكن ماله من خلاف مساعداتـي = قـوة الماطـور ترفـع مقدميـة
وان عطيت ابه الفجوج الخالياتي = فزته تعطيـك عـزم ومعنويـة
ماوقف يطبـخ بلوفـه ذايباتـي = والشـراب مغلـق مـن تانكيـة
وإن نظر راعيه مع كل الجهاتي = مايشوف الا الخـلا والمهمهيـة
للسراب وللمعاصيـر اعتماتـي = عبلةٍ جـردا وشمـسٍ صنقريـة
وأيس المسكين من تالي الحياتي = وأرتكى فوق الكفر يكتب وصية
كن جَلده جَلـد خيـل هاجماتـي? = أول الغارة فرس شيخ الغزيـة
أن هجم قدم السبـاق الأولاتـي = يشتبك هو والعدا فـوق العبيـة
وان رجع يثني خلاف التالياتـي = يقهر السبـق ويرجـع للرديـة
وإن كسب حم الذرا والمسرجاتي = مايخيب ضن من قـال الحذيـة
غازيٍ يبغى النقى قبل الفواتـي = غاديٍ له عنـد عدوانـه شفيـة
أزعجنـه بالصيـاح الناعياتـي = كل ما نادى المنادي فـي سميـه
أتعجـب بالعلـوم الماضيـاتـي = وألتفت في موتري واذكر مزيـة
مع جراديح الحـزوم النابياتـي = كن حذفه للحصى حذف أهوشية
لا وطى له مروةٍ راحت شتاتـي = كل قطعة طيرت مثل الشضيـة
يم حايل من شمـال امغرزاتـي = ماقصد غير الطهيمي في مجيـة
ناصٍ عليان في موضوع ذاتـي = مايسـده واحـدٍ مابـه حمـيـة
ما يسده غيـر راع الواجباتـي = يوم ولد اللاش يبخل في طليـة
والدلال الصفر دايـم والماتـي = من قديم الوقت راعـي شاذليـة
والعشاء كثر الضيوف امفطحاتي = كل واحد له ذبيحة فـي صينيـة
كنس ماهن مـن المستورداتـي = ما يجيب البربـري والساكنيـة
ما يجيب الا السمـان الغالياتـي = يتخير فـي نجـد نجـد العذيـة
بين حايـل والقصيـم مربعاتـي = بالفياض اللي مناضرهـا بهيـة
من بعد سيل الوسـوم مسيلاتـي = مرتين امـن المـزون العقربيـة
أول النـاوة سيـولٍ جارحاتـي = وآخر الناوة قرى صمد وشغيـة
الزهور اللي على روس النباتي = يشبعن إبها الضحى وأرضٍ مرية
ما تثنـن بالمـراح مهوجراتـي = ولا عطوهن من علاج البيطريـة
والمداخـن بينهـم متعاقبـاتـي = كل وحدة راسهـا ياخـذ أوقيـة
ما قطع فيهن عطـور السيداتـي = ريحة المعمول ولـى الجاونيـة
مايخلي نافـذه لأهـل الشماتـي = جعـل مايبقـى لتاليهـم بقـيـة
وله عوايد بالعطايا المعجزاتـي = الجيوب الشهب يعطيهـا هديـة
ومن بغى يزعل من العلم الثباتي = ما عليَـه منـه والله مـا عليـه
إن زعل يرد البحور المالحاتـي = إن رضي ولى إيبنط في طميـة
يا ولد راشد بـدون مجاملاتـي = حايزٍ كـل المزايـا الجوهريـة